阿叔...好走

阿叔 - 三姐夫的爸爸，老一代的人怕兒子養不大，所以他從小便會叫爸爸做阿叔。

第一次見阿叔時，是他在美國回來香港渡假。中氣十足的他，風趣幽默、面蛋胖嘟嘟，一個非常之可愛的老人家。阿叔不需要人家擔心，在八十幾歲高齡還可以不用拐杖的自己去遊山玩水。無論甚麼時候，阿叔都會衣著整齊光鮮。

最近他入了醫院，很多次都想去探望他，終於在昨晚跟姐姐和姐夫一起去探他。眼前見到的他，瘦了很多很多，雙眼無神很迷茫，手腳因為插喉及沒有郁動而腫脹。姐姐跟他說我來了，他也沒甚反應。後來，他又好像知道我來了的，說話不清說出我的名字。看見他，我淚不自覺地流下來。

今早收到姐姐送來的SMS，說阿叔在凌晨4.46分去世，走時十分安詳。

天氣跟心情掛勾

昨天天小姐心情不好, 不知是誰整喊了她, 好像開水喉似的沒有關上。閉關練功的我, 沒有受太大的影響。

這陣子, 當我一踏入教會, 就有一種莫名其妙的生疏感。見到弟兄姊妹, 他們會跟你說, 好耐無見啦! (縱使其實我個個星期都有返) 又或者, 我要claim錢 (今年我是助道部的文書, 所有助道部的開支也要經我)。沒有歸屬感, 跟弟兄姊妹沒有任何交流, 有時會問, 我星期日返祟拜是為了敬拜神, 為何我一定要返這間教會呢? 其實這問題已經存在很久, 想一想應該是由我沒有作青少年的導師開始。想退下來休息, 怎知這一退令我跟教會的關係也退了。好像這個家跟我初相識時不一樣。是自己的問題? 抑或是因為沒有事奉, 所以不用太多關注? 又抑或教會真的開始多人了, 一些"老"教友會自己識得照顧自己,不用擔心。對自己、對教會都有失望。

驚魂記

今早發生了一件驚魂事，我真係嚇到傻左，而我仲可以係到寫到呢篇blog，真係非常之感恩。

話說昨天清明節約了家人中午去拜山，我起身後便煮野食，煮完野食，洗完碗便出門口。到下午四點鐘左右返到屋企，約左朋友七點食飯然後去睇演唱會，但見有時 間就開洗衣機洗衫，而洗衫時我通常會將廚房門關上，可以減低噪音。我就一邊係廳睇報紙，一邊就佢洗完。到差不多洗完的時候，我便開番到廚房門，覺得個廚房 好熱，心諗唔通因為我洗冷衫，所以熱氣特別勁。我都沒有理會，就掠衫，之後便出門口。

睇完演唱會返到屋企，平時我會一返屋企多數開廚房盞燈，但尋日唔知點解，我卻開左廳的燈，沖完涼便熄燈上床瞓覺。到今朝起身，去廚房倒杯水飲，之後去洗頭。洗完頭後，入廚房整早餐，當我準備開爐煮早餐的時候...發現爐頭中間的掣係開左一半！而個爐頭上面的煲係好熱！

真係咩都醒晒，我第一時間關左個爐頭，之後開廚房窗，再將個好熱的煲放係sink盤到，然後出番個廳到不停的同神講「感謝主！」因為係呢差不多24小時裡面，我開過燈，又熄燈，屋企無爆炸，而個煲在不停的加熱下都無事！我真係好感謝神。真係唔死都算係神的眷顧。

當我話呢件事比我父母聽的時候（因為大姊不在香港，所以我要他們應承我不能爆響口，否則，我後果堪虞），個心都卜卜跳，諗番起都好驚。今天臨出門口時，我都再三檢查是否所有的電器及爐頭都關及熄左。

呢排真係好失魂，係公司成日做錯野之餘，今次係屋企仲搞件咁的事，我真係要求神俾我警醒做人！