睇奧運！

嘩，呢個幾星期以嚟，我真係未得閒過。唔係搵到野做喎，而係全職睇奧運。

我真係狗屎垃圾都睇架，今年因為係北京搞奧運，絕無時差的限制，加上好得閒，差不多每項的比賽都有睇。最可惜的係未有裝高清的機頂盒，所以只有無線、亞視同埋明珠台播咩我就睇咩。再加上我去左北京的奧運主辦網頁，佢地d資料齊全之餘，又有即時報分，有時比電視直播的分早出。咁你就知邊隊會勝出。真係好鬼正。

其實主力都係睇亞視多，一個徐嘉諾已經好夠，又識野，又唔會亂車廿四。而且亞視的評述員真係教曉你點樣去睇每項的運動，唔似無記，佢地d人爭野講之餘，更加擦鞋擦出面；剩係識得捧中國隊。其他國家都要欣賞呀，唔可以咁偏幫，要中立呀！

而聽到無記班所謂奧運主持，特別係嗰幾個港姐同埋個前女運動員主持，真係一聽到佢地講野我就要mute左部電視。而且無記的廣告係多到不得了，佢地最齊心的一句係咩 :「好，去一去廣告先！」好在屋企個電視有類似畫中畫的功能，同一時間可以有兩個電視畫面唔同台一齊出現。咁無論我睇緊的邊個台做緊廣告，我就即刻睇下另一個台做咩，所以一分鐘都唔會錯過。

下屆奧運就無得再咁放肆的去睇啦，一來係倫敦搞，有時差；二來係因為好似個播映權比有線獨家，所以無得睇咯。咁唯有在奧運仲剩番幾日的日子，再全力去睇啦！

而下星期無奧運的日子，我諗我要一段時間才可以適應番，亦都係時候又再積極搵工啦 ！話時話，呢個幾星期裡面，我真係無乜搵工 :P