俾我發洩下

我的EQ真係好差, 定抑或我係八號仔, 唔鍾意d人做嘢完全無計劃呢? 之前份工係因為老細唔多理我, 而我做嘢可以完全在我控制範圍內, 咁我自己有數得計, 好清楚個work flow係咩。但今次....今次真係頂唔順!

兩個星期前, 個客話要六月七日搞個記招, 我已經覺得無可能。奈何老板剛剛去了雅典睇波(都話戲無益嘅啦!), 合作伙伴唔識推, 乜都應承個客。好, 唯有做啦, 搵著間唔多合作的公關公司, 報價超貴, 有病! 同個客講就乜都得, 同我地講就乜都唔得。合作伙伴又係唔識炒左佢地搵過間, 直到我老板返來, 先將呢d要推人的屎比佢搞。

好啦, 就咁無左一個星期, 時間越來越緊迫, 個客又諸多要求, 要呢樣要嗰樣。乜都話你地話我知你會點做, 提議左比佢地, 佢地又係到吱吱喳喳, 又話呢樣唔得嗰樣唔得。最勞氣係, 不斷係到壓價, 壓到我地死死下! 雞毛蒜皮咁少的嘢都係到斤斤計較, 我覺得佢地好少家。比的料又唔夠, 又要馬兒好, 又要馬兒不吃草。合作伙伴係鬼佬, 佢又係識得講唔識做。而家仲有一堆屎未話比個客知, 我都唔知佢會點搞!

老板比的instruction又唔清楚, 我有時做到好忟就係因為個個都無planning。老板又唔話個big picture 比我知, 等我幫佢handle, 佢自己攬實晒, 每個party都係知少少! 你話點做嘢?

我真係好唔開心! 頭先真係想喊, 好耐都無為到工作而喊。我記得上次我為工作而喊係零五年的事, 之後我考慮左半年就決定辭職唔做。今次, 唔知會唔會都係咁呢?