2008年回顧

每年的年尾都會有乜乜大事回顧，而最後總會說句展望新一年會點點點。

我都學吓電視台作個一年回顧先。

2008年最開心的有2件事：
事件一：終於可以去到我呢世人最想去的地方 - 以色列。個人覺得，作為一個基督徒，點都要去耶穌出世的地方看一看。所以在有假期，又有特別的offer之下，神讓我完成了其中一個夢想。

事件二：2008年是我信主20年的日子，除了事件一作為慶祝外，我也立志在信主紀念日前看完聖經一次。終於在2007年頭開始，在2008年的5月完成。這已是我第2次看完整本聖經。

其實，2008年我過得不是太開心。

工作：因為自己的任性加好勝，以為自己咁有學歷同工作經驗，應該不會太難找到工作，就在08年頭不再做一份好hea的工作。怎知去完旅行回來，做左3個月的替工，就一坐就四個月，無所事事，百無聊賴，不是生產。開始整個人陷入最低谷的狀態，否定自己得好勁。唔想見人...但人在最無助的時候，就係神工作的時間。神在金融海嘯前夕，給我一份半年的替工。雖然人工不高，但我已經好感恩。縱使新工作也是傳媒機構，但新工作的性質是我完全不熟悉。又再陷入一個唔知自己做緊乜的狀態。

感情：仍然一遍空白。唔知我個Mr. Right會幾時出現呢？所以生日願望都求神為我預備另一半咯。^_^

家庭：為到爸爸的健康由年頭擔心到年尾。2008年的最後一天，我都係陪他去左PW到照腸，又割左ｄ息肉出嚟。而感謝神的係媽咪身體都算不錯，而且她好主動咁跟我返教會。

唔...08年回顧都係咁上下啦。

聖誕禮物

大約上班一個月到，老板問我可否做多一個月，那時，我正申請一份新工。所以我說我考慮下，但怎樣也好，我會幫他到４月３日（原有合約的約滿日期）。

已在這裡工作三個月了，跟所有人（包括同事及客戶）也有一定程度的認識及感情，所以今天決定跟老板說我可以幫他做多一個月。那邊廂跟他說完後，會計部的主管便將有關續約的信給我，而我新的約滿日期會是５月１日（咦．．．公眾假期嚟嘅噃，咁咪賺左１日咯。），之後會點，我想再續約的機會應該不會太大，我正盤算合約完了後，給自己一個長假期，到處遊玩一番。

若是，我首站的目的地應該會是袋鼠國，有八年多的時間沒有回去了，是時候返去玩玩睇睇。

無論如何，也很感謝神給我這份意料之內的聖誕禮物！

行山

連續兩個星期六都跟世伯去左行山，呢個時候去行係最好的，因為天氣剛剛涼，陽光依然燦爛盛放。

上星期去了西貢那邊，由早上九時半起行，行到晚上六點左右啦。去左白沙澳、蛇石坳、石屋山、嶂上許林士多，逆走麥徑３段、過牛耳石山落回北潭坳，之後去西貢食飯。行到落山雙腿好似唔再屬於我咁！不過連世伯行到落山之後都腳震震。之後就痛左四日，仲要問爸爸借個按摩機嚟按摩！

（就係行完呢條ｚ路之後，腳都震埋）

（個天真係一舊雲都無，幾靚）

但係痛完後好似又無咩野咁，就係呢個星期六，個天清到一舊雲都無的日子下去左元朗大棠行我之前行過的元荃古道。但係唔知點解，完全無印象直至我去到那個喜香農莊之後，我才記起我行過。不過可能是上星期行完之後都未復元，行上山的時候都有ｄ痛同埋好似拉牛上樹咁。但係落嗰五百級的樓梯後，我雙腿又無乜痛喎。真係要行多ｄ山先得啦。

我諗住報名環島行，希望行到啦。

古法

時常聽人家說用古法醫治，現在已經有很多古法失傳了。

小時候當我不舒服的時侯，爸爸會用手帕包著一隻去除蛋黃的烚蛋，然後放入銀戒指碌我的額頭、肚仔、全身，為的是幫我驅風。而當碌過後，這隻銀戒指會有時係紅色，有時係藍色。媽媽說紅色即是火，藍色是風。每次碌完之後，整個人又真係舒服一點。

我家還有一個驅風的古法，每當我肚痛時，爸爸就會叫我焗肚，而這焗肚就是類似拔罐的古法。焗肚就是用家中那個很厚的玻璃啤酒杯，放入燒著的草紙（唔知點解一定要用草紙），然後在火光熊熊之下向肚臍的位置按下，它自自然的吸吮肚皮，而重重的啤酒杯就是這樣的懸空不會掉下來，但當"身體"的風沒有時，它會自動的掉下。但記得試過一次那個啤酒杯吸吮我的肚皮成五個小時也不掉下來，最終係要用力的扯掉它，爸爸說我有很多風。

另一個古法是用線戒面，婆婆在我小時候已教授這個古法給媽媽，媽媽也曾為我試過一次，但因面毛不多，所以戒完後很痛。

不知這些古法，你有沒有試過呢？

生理...病了！

沒有OT文化的公司，是一種好處，也是一種壞處。我很想將當天的工作完成，但老板一時三刻的不停轉的主意，令我完全無把握能將自己的當天工作完成。就如我之前所說，backlog永遠是backlog，由第一天的一張紙，到現在已經開始pile up。不知那天會可以將那小小山移走。

最近不知是工作壓力抑或自己所食的東西有問題，每天下午六點到就會胃痛，昨晚更痛到我平生第一次吃胃藥。不單胃痛，連平日準時來的親戚也遲了很多，還有睡不好，又再發夢返工。其實我都唔明，係乜野原因會有以上種種的毛病，我話晒都係簽左合約，佢地點都唔會炒我，我驚咩呢？點解我會有壓力呢？

上京赴考

在未上班之前，我都問過老細要唔要出trip，佢話都可能要，眨眼間就到我要上京赴考的日子啦。早機去，晚機返，考足六天。

所考的科目包括：
1) 跟老外一起去開會，要做即時傳譯
2) 要帶老外出外吃飯，睇下可以比ｄ咩佢食，又唔會食到佢水土不服
3) 要同京戶人士溝通

仲有，我都唔想去諗啦，總之今次係我學左普通話一年之後的大測試。星期四那天跟老師傾了個半鐘，我已經想死，今次仲要考足六天，我都唔知會點。今次真係 Mama Mia!

話咁快一個月!

真係話咁快就返左工一個月啦！係呢個月裡面，我數埋見老細的時間唔夠五天。不過無要緊，佢唔係到，我地仲可以趕埋ｄ backlog。但是永遠都係趕唔完，每天也會有新的工作，而backlog就永遠繼續係backlog!

係呢度工作，最開心的是這公司沒有OT文化，每天的6:30整間公司只有小貓三四隻，而我又無大門鎖匙，所以我都可以話準時放工的人。而每天放工，又可以去地鐵特惠站到"嘟"一"嘟"，慳番2蚊雞！若我行去銅鑼灣站搭地鐵，仲可以前後慳番3個"耳"！真係好開心架！唯一美中不足的就係返工搭地鐵時，每天都要同陌生人有肌膚之親。

講番ｄ開心的事，係呢度做每個月中就會出當月的糧，所以我今個月就出左個半月的糧，而就係今晚，我就去左銅鑼灣shopping啦！呵呵呵！